ઓ ઈશ્વર ભજીએ તને

ઓ ઈશ્વર ભજીએ તને મોટું છે તુજ નામ
ગુણ તારા નિત ગાઈએ થાય અમારાં કામ

હેત લાવી હસાવ તું સદા રાખ દિલ સાફ
ભૂલ કદી કરીએ અમે તો પ્રભુ કરજો માફ

પ્રભુ એટલું આપજો કુટુંબ પોષણ થાય
ભૂખ્યા કોઈ સૂએ નહિ સાધુ સંત સમાય

અતિથિ ભોંઠો ના પડે આશ્રિત ના દૂભાય
જે આવે મમ આંગણે આશિષ દેતો જાય

સ્વભાવ એવો આપજે સહુ ઈચ્છે મમ હિત
શત્રુ ઈચ્છે મિત્રતા પડોશી ઈચ્છે પ્રીત

વિચાર વાણી વર્તને સૌનો સાચો સ્નેહ
કુટુંબ મિત્ર સ્નેહીનું ઈચ્છું કુશળ ક્ષેમ

જોવા આપી આંખડી સાંભળવાને કાન
જીભ બનાવી બોલવા ભલું કર્યું ભગવાન

તારા આભે શોભતા સૂરજ ને વળી સોમ
એ તો સઘળાં તેં રચ્યાં જબરું તારું જોમ

અમને આપ્યા જ્ઞાન ગુણ તેનો તું દાતાર
બોલે પંખી પ્રાણીઓ એ તારો ઉપકાર

કાપ ક્લેશ કંકાસ ને કાપ પાપ પરિતાપ
કાપ કુમતિ કરુણા કરી કાપ દુખ સુખ આપ

ઓ ઈશ્વર ભજીએ તને મોટું છે તુજ નામ
ગુણ તારા નિત ગાઈએ થાય અમારાં કામ