நாட்டுப் படலம் - 43

மைந்தர் கூட்டம்

43.

வென் தளக் கலவைச் சேறும்,
   குங்கும விரை மென் சாந்தும்,
குண்டலக் கோல மைந்தர் குடைந்த,
   நீர்க் கொள்ளை, சாற்றின்,
தண்டலைப் பரப்பும், சாலி
   வேலியும் தழீஇய வைப்பும்,
வண்டல் இட்டு ஓடு மண்ணும் -
   மதுகரம் மொய்க்கும் மாதோ.
  
வெண்தளக்     கலைச் சேறும்- பச்சைக் கற்பூரம் கலந்த சாந்தும்;
குங்கும  விரை  மென்  சாந்தும்-  குங்குமப்  பூ  முதலியன  கலந்த
சந்தனமும்  பூசிய;  குண்டலக்  கோல மைந்தர்- குண்டலம் அணிந்த
அழகிய  ஆண்கள்; குடைந்த நீர்க் கொள்ளை- முழுகி நீராடிய அந்த
வெள்ளப்   பெருக்கை;   சாற்றின்-   சொல்லுவதாயின்;  தண்டலைப்
பரப்பும்-   சோலைப்   பரப்புகளிலும்;  சாலி  வேலியும்-  நெற்பயிர்
விளையும்  வயல்களிலும்;   தழீஇய வைப்பும்- அவற்றைச் சார்ந்துள்ள
நிலப்  பகுதிகளிலும்; வண்டல்  இட்டு  ஓடும்  மண்ணும்-  வண்டல்
படியும்படி  (நீர்)    ஓடும்  ஏனைய  மண்  பகுதிகளிலும்;  மது  கரம்
மொய்க்கும்- வண்டுகள் மொய்த்துக் கொண்டிருக்கும்.

ஆடவர்     பூசிய நறுமணக் குழம்பும் சாந்தும் கொண்ட எங்கணும்
பரவியிருப்பதால்,    மணத்தின் வழியே சென்று தேன் நாடும் வண்டுகள்
பல    இடங்களிலும்     மொய்த்துக்    கிடந்தன.   அவை   மணம்
நுகர்ந்தனவேயன்றித்    தேன்  காணவில்லை.  வெண்டாளம்:  பச்சைக்
கருப்பூரம் தழீஇய-சொல்லின் அளபெடை.                      12