மிதிலைக் காட்சிப் படலம் - 571

571.

தண்டுதல் இன்றி ஒன்றி.
   தலைத்தலைச் சிறந்த காதல்
உண்டபின். கலவிப் போரின்
   ஒசிந்த மென் மகளிரேபோல்.
பண் தரு கிளவியார்தம்
   ?புலவியில் பரிந்த கோதை.
வண்டொடு கிடந்து. தேன்சோர்.
   மணி நெடுந் தெருவில் சென்றார்.
 
தண்டுதல் இன்றி- நீங்காமல்; தலைத் தலை ஒன்றி -  (கணவன
மனைவி  என்கிற) இரண்டு இடங்களிலும் ஒரு தன்மைய தாய்; சிறந்த
காதல்   -   மிகுதியான   ஆசையின்  பயனான  காம  இன்பத்தை;
உண்டபின்  -  (ஆடவரும்  மகளிரும்)  ஒருசேர அனுபவித்த பின்பு;
கலவிப்  போரின்  -  அந்தப்  புணர்ச்சியாகிய போரிலே;  ஒசிந்த
- சோர்ந்து  கிடந்த;  மென் மகளிரே  போல்   -  மென்மையான
பெண்களைப் போல; பண்தரு  கிளவியார்தம் - இசைப் பண்ணைப்
போன்ற சொற்களைப் பேசும் பெண்களின்; புலவியில்- ஊடல்களிலே;
பரிந்த கோதை  -  (அவர்களால்)  கழற்றி  வீசப்பட்ட   மாலைகள்;
வண்டொடு   கிடந்து -  (தம்மேல்   மொய்த்த)    வண்டுகளுடன்
கீழே  விழுந்து   கிடந்து;    தேன்   சோர் -  தேன் வழிவதற்கு
இடமான;   மணி  நெடுந்தெருவில் -   அழகிய   பெருவீதிகளில்;
சென்றார் - போனார்கள்.

மாதரும்   பூமாலைகளும்: புணர்ச்சிக்குப்பின்  மெலிந்து  உறங்குகிற
பெண்களைப்போல்   அம்மகளிரால்   ஊடலால்     வீசியெறியப்பட்ட
பூமாலைகள்   வாடிக்   கிடக்கின்றன.   மிதிலைத்தெரு:   மிதிலையின்
தெருக்கள்   பலவகைப்   பட்டன     என்பதைத்  தெரிவிக்க  மூன்று
பாடல்கள் அமைந்துள்ளன.                                   7