தாடகை வதைப் படலம் - 356

பாலைவனத்தின் பசையற்றநிலை

356.

தா வரும் இரு வினை செற்று. தள்ள அரும்
மூவகைப் பகை அரண் கடந்து. முத்தியில்
போவது புரிபவர் மனமும். பொன் விலைப்
பாவையர் மனமும். போல் பசையும் அற்றதே!
 
தா வரும் இருவினை செற்று  -  தாவி   வருகின்ற   நல்வினை.
தீவினையாகிய இரு வினைகளையும் அழித்து; தள்ள அரும் மூவகைப்
பகை    அரண்கடந்து -  தள்ளுதற்கு   அரிய மூன்று  வகைப்பட்ட
உயிர்ப்  பகை  ஆகிய  காவலையும்  கடந்து;  முத்தியில்  போவது
புரிபவர்மனமும் - வீடு  பேறடைவதற்குரிய காரியங்களையே செய்யும்
ஞானிகள்  மனமும்; பொன்   விலைப்   பாவையர்   மனமும்  -
பொன்னுக்குத்   தமது  மேனியை   விலைகூறும்  விலை  மாதர்களின்
மனமும்;  போல் பசையும் அற்றதே - (எவ்வாறு பசையற்றிருக்குமோ
அதுபோல்) இப்பாலை வனமும் பசையற்றுக் கிடந்தது. 

தா+வரும்.:   தாவிவரும்.  நல்வினையும்    பிறப்புக்குக்   காரணம்
என்பதால்  இருவினையும்  ‘செற்று’  என்றார்.   மூவகைப் பகையாவது.
காமம்  வெகுளி  மயக்கம்  என்னும்   மூன்றுமாம்.  இருவினை செற்று
மூவகைப்பகை  வென்றவர்களே வீடு  பேறடைதற்கு  குரியர் என்பதால்
‘முத்தியில்  போவது  புரிபவர்’   என்றார்.  ஞானிகள்  பற்றற்றவர்கள்.
பாவை:  உவமை  யாகு  பெயர்.   விலை  மாதர்  பசையற்றவராதல் -
தம்மை    நாடிவந்தவரிடம்     இரக்க    மற்றிருத்தலாம்.    எனவே
அப்பாலைநிலம்  முத்தியை   விரும்பும்  ஞானிகளின் மனம் போலவும்
பொன்  விலைபாவையர்  மனம் போலவும்   பசையற்றிருந்தது என்பது
கருத்து. தா: துன்பமும் ஆம்.                                 15