கையடைப் படலம் - 335

இராமலக்குவருடன் விசுவாமித்திர முனிவன்
புறப்படுதல்

335.

கொடுத்த மைந்தரைக் கொண்டு. சிந்தை முந்து
எடுத்த சீற்றம் விட்டு. இனிது வாழ்த்தி. ‘மேல்
அடுத்த வேள்வி போய் முடித்தும் நாம்’ எனா.
நடத்தல் மேயினான். நவைக்கண் நீங்கினான்.
 
கொடுத்த மைந்தரைக் கொண்டு - தயரதன் கொடுத்த பிள்ளைகள்
இருவரையும் ஏற்றுக்  கொண்டு; முந்து சிந்தை எடுத்த சீற்றம் விட்டு
- முன்னர் மனத்தில் ஏறிய  கோபத்தை  விட்டு:  இனிது  வாழ்த்தி -
மன்னனை    இனிதே   வாழ்த்தி: மேல் அடுத்து  வேள்வி  போய்
முடித்தும்  நாம்  என  - இனிமேல் சென்று. தொடங்கிய வேள்வியை
நாம்    முடிப்போம்   என்று.;   நவைக்கண்  நீங்கினான் நடத்தல்
மேயினான்   -  குற்றம்   நீங்கிய   முனிவனாகிய   விசுவாமித்திரன்
புறப்படலானான்.

கொடுத்த:  அடைக்கலமாகக்  கொடுத்த. கொண்டு பெற்றுக்கொண்டு
முந்து:  முன்   என்பதன்  மரூஉ. எடுத்த: மேலெழுந்த. சீற்றம்: சினம்.
அடுத்தல்.   தொடங்குதல்.  முடித்தும். தன்மைப் பன்மை வினைமுற்று.
நடத்தல்மேயினான். நடக்கத்  தொடங்கினான். நவை: குற்றம்.      19