கார்முகப் படலம் - 789

789.    

வயிரியர் மதுர கீதம்.
   மங்கையர் அமுத கீதம்.
செயிரியர் மகர யாழின்
   தேம் பிழி தெய்வ கீதம்.
பயிர் கிளை வேயின் கீதம்.
   என்று இவை பருகி. விண்ணோர்
உயிருடை உடம்பும் எல்லாம்
   ஓவியம் ஒப்ப நின்றார்.
 
வயிரியர்    - கூத்தர்களின்; மதுர கீதம் - இனிய   பாடல்களும்;
மங்கையர்  அமுதகீதம் - மகளிரின் அமுதப் பாடல்களும்; செயிரியர்
-  யாழினை  மீட்டும்  பாணர்; மகரயாழின் தேன்பிழி - மகரயாழிலே
தோன்றும்   தேன்  பிழிந்தாற்  போன்ற;  தெய்வ  கீதம்  -  பாடும்
தெய்வத்தன்மையுள்ள  பாடல்களும்;  வேயின்  பயிர்கிளை- புல்லாங்
குழலிலிருந்து   ஏழிசை  அடிப்படையில் தோன்றும் பல்வேறு ராகங்கள்;
கீதம் - ஒலிக்கவும்; என்ற இவை - என்ற இவற்றை; பருகி - செவியிற்
கேட்டு; விண்ணோர் - தேவர்கள்; உயிர்உடை - உயிருள்ள; உடம்பு
எல்லாமும் -  உடல்  எல்லாம்; ஓவியம்  ஒப்ப நின்றார் - சித்திரம்
போல (அசைவற்று) நின்றார்கள்.

சீதையின்     திருமணம் விரைவில் நிகழும் என்ற    மகிழ்ச்சியால்
பாணர்  முதலியோரின் கீதங்கள் நிகழ்ந்தன;  அப்  பாடல் இனிமையில்
ஈடுபட்டு விண்ணவர் சித்திரம்போல நின்றனர் என்பது.            40