எழுச்சிப் படலம் - 829

சேனையில் உள்ளவர் அணிந்த ஆபரணங்கள்
முதலியவற்றின் செயல்

829.    

இழையிடை இள வெயில் எறிக்கும்; அவ் வெயில்.
தழையிடை நிழல் கெடத் தவழும்; அத் தழை.
மழையிடை எழில் கெட மலரும்; அம் மழை.
குழைவுற முழங்கிடும். குழாம் கொள் பேரியே.
 
இழை    இடை- (சேனையிலுள்ள மாதரும்  வீரரும் அணிந்துள்ள)
அணிகலன்களிலிருந்து;  இளவெயில்  எறிக்கும்  - இளவெயில் வீசும்;
அவ்  வெயில் -  அந்த  வெயிலானது;  தழை  இடை - மயில்பீலிக்
குடைகளினிடையே    தோன்றும்;  நிழல்கெட  -  நிழல்  ஒழியும்படி;
தவழும்  -  எங்கும்   பரவும்;  அத் தழை - அந்தப் பீலிக்குடைகள்;
மழை  இடை  எழில்  -  நீரைக்  குடித்த மேகங்களின் அழகு; கெட
மலரும்  - அழியும்படி விளங்கித் தோன்றும்; அம்மழை குழைவு உற
-  அம்  மேகங்கள்  தளர்ச்சியடையும்படி;  குழாம்  கொள்  பேரி -
கூட்டமான பேரிகைகள்; முழங்கிடும் - முழங்கும்.

அணிகலன்களின்     இளவெயில்  வீசும்;அவ்வெயில் மயில் பீலிக்
குடைகளின்  நிழல்  அழியுமாறு  அந்த நிழலில்   தவழும். அப் பீலிக்
குடைகள்  தம்  நீல  நிறத்தால் மேகங்களின் அழகு கெட  அங்கங்கே
விளங்கித்  தோன்றும்; அம் மேகங்களும் இத்தகைய   இனிய பேரொலி
நமக்கு   இல்லையே   என்று   நாணிக்    குழைய  முரசக்கூட்டங்கள்
முழங்கும் என்பது.                                          13