வேள்விப் படலம் - 432

இரிசிகன் பிரமனுலகிற் புகுதல்

432.

காதலன் சேணின் நீங்க.
   கவுசிகை தரிக்கலாற்றாள்.
மீது உறப் படரலுற்றாள்.
   விழு நதி வடிவம் ஆகி.
மாதவர்க்கு அரசு நோக்கி.
   ‘’மா நிலத்து உறுகண் நீக்கப்
போதுக. நதியாய்’’ என்னா.
   பூமகன் உலகு புக்கான்.*
 
காதலன்   சேணின்  நீங்க  -   கணவனான   இரிசிகன்  செய்த
தவப்பலனால்  வான்வழி  செல்வதற்குத் தன்னை விட்டு நீங்க; கவுசிகை
தரித்தல்   ஆற்றாள்   -  என்  முன்னவளான  கவுசிகை  பொறுக்க
இயலாதவளாகி;  விழு  நதி  வடிவமாகி  -  பெரிய  ஒரு நதிவடிவம்
எடுத்துக்கொண்டு;  மீது  உறப்படரல்  உற்றால்  -  மேலே  போகப்
புறப்பட்டாள்;  மாதவர்க்கு அரசு நோக்கி- முனிவர்களுக்கு அரசனான
இரிசிகன் அதனைப் பார்த்து; மாநிலத்து உறுகண் நீக்க- நிலவுலகத்துத்
துன்பத்தைப் போக்க; நதியாய்ப் போதுக என்னா - ஆறாகப் பெருகிச்
செல்வாயாக  என்று (கூறி); பூமகன் உலகு புக்கான் - பிரமன் உலகைச்
சென்றடைந்தான்.

காதலன்:  கணவன்.  சேண்:  உயர்வு  இங்கு வானைக் குறிக்கும்).
தரிக்கல்:  பொறுத்தல்.  மீது:  உயர்வழி.  படரல்:  நகர்தல். உறுகண்:
துன்பம்.   போதுக:  போவாயாக.  வியங்கோள்வினைமுற்று.  பூமகன்:
மலரில் இருப்பவன். புக்கான்: புகுந்தான்.

கணவன்   விண்ணுலகேக.  பொறுக்கலாற்றாத  கவுசிகை  நதியாகி
மேலே  தொடர.  இரிசிகன் உலகத்துத் துன்பம் நீக்க. ஆறாகச் செல்க
எனக்கூறி. பிரமனுலகு சென்றான் என்க. என்னா: என்று கூறி. செய்யா
என்ற வாய்பாட்டு வினையெச்சம்.                             13