வரைக்காட்சிப் படலம் - 964

அந்தியில் சந்திர சைலத்தின் தோற்றம் (964-965)

964.

திணி ஆர் சினை மா மரம் யாவையும்
   செக்கர் பாய.
தணியாத நறுந் தளிர் தந்தன
   போன்று தாழ.
அணி ஆர் ஒளி வந்து நிரம்பலின்.
   அங்கம் எங்கும்.
மணியால் இயன்ற மலை ஒத்தது -
   அம் மை இல் குன்றம்.
 
திணி  ஆர்  சினை - வலிமையான கிளைகள் கொண்ட; மா மரம்
யாவையும் - பெரிய மரங்கள் யாவும்; செக்கர் பாய - செவ்வானத்தின்
ஒளி  வீசுவதால்;  தணியாத நறுந்தளிர் -  குறையாத சிறந்த தளிர்கள்;
ஈன்றன  போன்று  தாழ  -  புதிதாகத்  தழைத்தன  போல விளங்க;
அங்கம் எங்கும் - தன்னுடல் முழுவதும்; அணி ஆர் ஒளி - அழகிய
அந்தச்  செந்நிற  ஒளி;  வந்து  நிரம்பலின்  -  வந்து  நிறைவதால்;
அம்மை  இல்  குன்றம்  -  குற்றமற்ற அந்த மலையானது; மணியால்
இயன்ற  -  செந்நிறமுள்ள  மணிகளால்  இழைக்கப் பெற்றுள்ள; மலை
ஒத்தது - மலையை ஒத்தது. 

செவ்வானம்     வீசப்  பெறுவதால்  செந்தளிர் புதிதாக உண்டாகப்
பெற்றால்   போன்ற  பல   மரங்கள்   கவிந்த  அந்தச்  சந்திரசயிலம்
செம்மணி கொண்டு இழைக்கப்  பெற்றது  போல் விளங்கிற்று என்பது -
தற்குறிப்பேற்றவணி.                                         37