திரு அவதாரப் படலம் - 265

புத்திரகாமயாகம் செய்தல்

265.

முகமலர் ஒளிதர் மொய்த்து. வான் உளோர்.
அக விரை நறு மலர் தூவி. ஆர்த்து எழ.
தகவுடை முனியும். அத் தழலின் நாப்பணே.
மக அருள் ஆகுதி வழங்கினான்அரோ.
 
வான்   உளோர்  முகமலர் ஒளிதர மொய்தது  -  வானுலகில்
வாழுகின்ற   தேவர்கள்   எல்லாம்  தங்கள்  முகங்களாகிய  தாமரை
மலர்கள்  ஒளி  தருமாறு  அங்கு  வந்து  நெருங்கி நின்று; அகவிரை
நறுமலர்  தூவி  -  உள்ளே  மணம்  மிகுந்த மலர்களைச் சொரிந்து;
ஆர்த்து  எழ  - ஆரவாரம்  செய்து  எழ; தகவு உடை முனியும் -
தகுதியுடைய  அந்தக் கலைக்கோட்டு முனிவனும்; தழலின் நாப்பண் -
அந்த   வேள்வித்   தீயின்   நடு   இடத்திலே;  மகவருள்  ஆகுதி
வழங்கினான்   -   பிள்ளைப்   பேற்றைத்   தரவல்ல  ஆகுதியைக்
கொடுத்தான்.

முகமலர்:     முகமாகிய மலர் என்பதால்  உருவகம்.  மொய்த்தல்:
நெருங்குதல். விரை: மணம். நறுமலர்: பண்புத்தொகை.  தூவி என்பதில்
‘தூ’  பகுதி.  நாப்பண்:  நடுவிடம்.  ஆர்த்து  ஆரவாரித்து.   ஆகுதி:
இங்குப்  ‘பூர்ணாகுதி’  யாம்.  தகவு:  தகுதி (வேள்வியை   நடைபெறச்
செய்யும்  தகுதியாம்).  அரோ:  அசை.  உள்ளோர்:  உளோர்   எனத்
தொகுக்கப்பட்டது. 

வானுவோர் -  தூவி  - மொய்த்து  -  எழ  -  முனியும் - ஆகுதி
வழங்கினான் என இயைக்க.                                  85