அகலிகைப் படலம் - 555

கௌதமன் இந்திரனுக்குச் சாபங் கொடுத்தல்

555.

‘தீ விழி சிந்த நோக்கி.
   செய்ததை உணர்ந்து. செய்ய
தூயவன். அவனை. நின் கைச்
   சுடு சரம் அனைய சொல்லால்.
‘’ஆயிரம் மாதர்க்கு உள்ள
   அறிகுறி உனக்கு உண்டாக’’ என்று
ஏயினன்; அவை எலாம் வந்து
   இயைந்தன. இமைப்பின் முன்னம்.
 
(அப்பொழுது)  செய்ய தூயவன்-  (நடுநிலை வழிச் செல்லக் கூடிய)
மனத்  தூய்மையுடைய  அம்  முனிவன்;  விழி  தீ  சிந்த நோக்கி -
கண்கள்  தீப்பொறியைக்    கக்குமாறு  கோபித்துப் பார்த்து; செய்ததை
உணர்ந்து  -  (இருவரும்)  செய்த தீச்செயலை அறிந்து; நின்கைச் சுடு
சரம்  அனைய  சொல்லால்  -  உனது  கையால் ஏவப்படும் கொடிய
அம்பு  போன்ற  சுடு   சொல்லால்;   அவனை  -  அந்த இந்திரனை;
ஆயிரம்  மாதர்க்கு உள்ள - பெண்களுக்கு உள்ள ஆயிரம்; அறிகுறி
உனக்கு - குறிகள் உனக்கு; உண்டாக என்று - உண்டாகட்டும் என்று;
ஏயினன்   -   சாப   வார்த்தையை  ஏவினான்;  அவை  எலாம்  -
(அவ்வாறே)  அப்பெண்குறிகள்  ஆயிரமும்;  இமைப்பின் முன்னம் -
இமைப்   பொழுதிலே;  இயைந்தன   -  அவன்   உடம்பில்  வந்து
பொருந்தின.

செய்ய   தூயவன்:   தன்னோடு   எவ்வித   உறவும்   இல்லாத
இந்திரனுக்குச்   சாபம்  கொடுத்தான்.  அத்தோடு  அமையால்  தன்
மனைவிக்கும்  ஒரு  சார்  அன்பு  காட்டாமல்  சாபம்  கொடுத்தான்.
ஆதலின்  கௌதமன்  தூயவன்  ஆனான்.  இந்திரனுக்கு  அமைந்த
சாபம்:  ஒரு பெண்ணின் குறியிடத்து இந்திரன் மிகவிருப்பம் கொண்டு
இழிந்த   செயல்  புரிந்தமையால்  அதனிடம்  வெறுப்பு  உண்டாகும்
பொருட்டு  அவனுடம்பு முழுவதும் பெண்குறிகள் அமையுமாறு சாபம்
அளிக்கப்  பெற்றது.  சுடு  சரம்  அனைய  சொல்: இராமனது அம்பு
பகைவரைக்  கொல்லுதலாகியத்  தன் பயனை விரைந்து தருதல்போல
முனிவர் சொல் கொடியவரை அழித்தலாகிய தன் பயனைத் தவறாமல்
விரைந்து தரும் என்பது குறிப்பு.                             21