நகர் நீங்கு படலம் - 1929

இராமன் முதலியோர் தேர்மிசைப் போதல்

மூவரும் தேர் ஏறிச் சேறல்  

1929.    

அன்ன தாயர் அரிதின் பிரிந்தபின்,
முன்னர் நின்ற முனிவனைக் கைதொழா,
தன்னது ஆர் உயிர்த் தம்பியும், தாமரைப்
பொன்னும், தானும், ஓர் தேர்மிசைப் போயினான்.

     அன்ன தாயர் - அத்தகைய தாய்மார்கள்; அரிதின் - சிரமப்பட்டு;
பிரிந்த பின் - பிரிந்து சென்ற பிறகு;  முன்னர்  நின்ற முனிவனைக்
கைதொழா -முன்னே நின்ற வசிட்ட  முனிவனைக் கைகூட்பி வணங்கி;
தன்னது  ஆர் உயிர்த் தம்பியும்- தன்னுடைய  அரிய உயிர் போலச்
சிறந்த தம்பியாகிய இலக்குவனும்;  தாமரைப்பொன்னும் - தாமரையில்
வீற்றிருக்கும் திருமகளாய சீதையும்;  தானும் - ஓர்தேர்மிசைப்
போயினான் - ஒரு தேர்மேல் ஏறிச்சென்றான்.

     தனது - தன்னது  விரித்தல் விகாரம் எதுகை நோக்கியது.  பொன் -
திருமகள்,  இங்கேசீதை.                                       234