தாடகை வதைப் படலம் - 352

352.

புழுங்கு வெம் பசியொடும் புரளும்பேர் அரா
விழுங்கு வந்து எழுந்து எதிர் விரித்த வாயின்வாய்.
முழங்கு திண் கரி புகும் முடுகி - மீமிசை
வழங்கு வெங் கதிர் சுட. மறைவு தேடியே!
 
புழுங்கு  வெம்பசியொடு  -  புழுக்கத்தைத்தரும்  மிக்க பசியுடன்;
புரளும்  பேரரா - அந்தப் பாலையில் புரண்டு்கொண்டிருக்கும் பெரிய
பாம்பானது; விழுங்க வந்து எழுந்து - எதிரில் வருபவர்களை விழுங்க;
எதிர் விரித்த  வாயின்வாய்  -  விரித்துக்  கொண்டிருக்கும்  அதன்
வாயில்; மீமிசை  வழங்கும்  வெம்கதிர்சுட  -  வானத்திலே சூரியன்
வழங்கும்   வெப்பக்  கதிர்கள்  சுடுதலால்;  மறைவு தேடி - மறைந்து
கொள்ளுதற்குரிய நிழல் தேடி;  முழங்கு  திண்கரி  முடுகிப்புகும்  -
பிளிறும் யானைகள் வேகமாக நுழையும்.

புழுங்கல்:   வெப்பத்தால் புழுங்குதல். அரா: பாம்பு (அரவு). பேரரா:
பெரிய  பாம்பு. கரி: யானை. மீமிசை:  மேலே  ‘வானம்’ என்ற பொருள்
தந்து நின்றது.                                             11