கார்முகப் படலம் - 805

தோழி நீலமாலை வருதல்

நீலமாலை உரைத்த மகிழ்ச்சிச் செய்தி

கலி விருத்தம்

805.    

வடங்களும் குழைகளும் வான வில்லிட.
தொடர்ந்த பூங் கலைகளும் குழலும் சோர்தர.
நுடங்கிய மின் என நொய்தின் எய்தினாள்.
நெடுந் தடங் கிடந்த கண் நீலமாலையே.*
 
நெடுந் தடம் கிடந்த- பெரிய தடாகத்தில் கிடந்த;கண்நீலமாலை -
குவளை  போன்ற கண்களையுடைய நீலமாலை என்பவள்;  வடங்களும்
-  (தன்  கழுத்தில்  பூண்ட) ஆரங்களும்;  குழைகளும் - காதணியான
குழைகளும்;  வானவில்  இட -  வானவில்லைப்   போலப்  பல  நிற
ஒளிகளை  வீசவும்;  தொடர்ந்த  பூங்கலைகளும் - உடுத்த உடையும்;
குழலும்   சோர்தர  -  மலரணிந்த  கூந்தலும்  அவிழ்ந்து  சரியவும்;
நுடங்கிய   மின்  என  -  துவண்ட  மின்னல்  போல;  நொய்தின்
எய்தினாள் - விரைவாக ஓடி வந்தாள்.

சீதைக்குத்     திருமணம்  நடக்குமாறு  இராமன்    வில்  முறித்த
செய்தியை  விரைவில் தெரிவிக்க வேண்டுமென்ற  ஆர்வத்தோடு  சீதை
இருக்குமிடம் வந்தாள் என்பது.

தோழியின்   பெயர் நீலமாலை. வானவில் இடுதல் - இந்திரவில்லின்
தன்மையவாய்ப்  பலநில  ஒளி  வீசுதல்.  ‘திருவில் இட்டுத்   திகழ்தரு
மேனியன்’ - சிலப். 15-156.                                   56