பால என்பது தோற்ற வரலாற்றைக் குறிப்பதாகும். இராமனது இளவயது வாழ்வைக் குறிப்பதனால் இது பாலகாண்டம் என வழங்கப்பட்டது. பாலகாண்டம் இருபத்துநான்கு படலங்களைக் கொண்டு அமைந்துள்ளது.

மிதிலைக் காட்சிப் படலம்

மிதிலா நகரத்தின் மாட மாளிகையின் மேல் அழகிய பட்டுக் கொடிகள் பறந்து கொண்டு இருந்தன. அக்கொடிகள் அனைத்தும், இராமபிரானை நோக்கி,"சீதா பிராட்டியை மணந்து கொள்ள விரைந்து வா!" என்று அழைப்பது போல அசைந்து, அசைந்து அவைகள் பறந்தன. விசுவாமித்திர முனிவருடன் இராம, லக்ஷ்மணர்கள் மிதிலையின் பெரிய வீதிகளில் சென்றார்கள். பெண்கள் தங்கள் கணவன்மாருடன் கொண்ட ஊடலினால், கழற்றி எறியப்பட்ட பூமாலைகள் வாடிக் கிடந்தன.